महिलांना न्याय देणे ही माझी जबाबदारी : प्रतीक्षा खलप

महिलांना न्याय देणे ही माझी जबाबदारी : प्रतीक्षा खलप

पणजी : गोवा प्रदेश महिला काँग्रेसच्या नवनियुक्त अध्यक्ष डॉ. प्रतीक्षा खलप यांनी राज्यातील महिलांना न्याय मिळवून देण्यासाठी काम करणार असल्याचे सांगितले. जीपीएमसीचे नवे अध्यक्ष म्हणून शपथ घेतल्यानंतर त्या बोलत होत्या. यावेळी अखिल भारतीय महिला काँग्रेसच्या अध्यक्ष अलका लांबा, गोवा प्रभारी माणिकराव ठाकरे, गोवा महिला काँग्रेसच्या मावळत्या अध्यक्षा बीना नाईक, गोवा प्रदेश काँग्रेस कमिटीचे अध्यक्ष अमित पाटकर, जीपीसीसीचे माजी अध्यक्ष गिरीश चोडणकर यांच्यासह पक्षाचे सदस्य व मान्यवर उपस्थित होते.
डॉ. खलप म्हणाल्या की, महिलांच्या न्यायासाठी लढा देणे हे त्यांचे ध्येय असेल.
महिलांचा रोजगार, शिक्षण आणि विकासासाठी काम करण्याची गरज आहे. सर्व महिलांना समान संधी मिळत आहे याची खात्री करायची आहे. महिलांच्या प्रगतीच्या मार्गात येणार्‍या अडथळ्यांना सामोरे जाण्याची गरज आहे. प्रत्येक स्त्रीला शिक्षणाची संधी मिळेल आणि त्यांची स्वप्ने साकार होतील, असा समाज निर्माण करण्याची गरज आहे. महिलांची सुरक्षा गरजेची आहे, महिलांचा आवाज दाबला गेला तर मी त्यांचा आवाज बनेन, असे त्या म्हणाल्या.
आपल्या भाषणात लांबा म्हणाल्या की, गेल्या पाच महिन्यांत महिला काँग्रेसने सदस्यता अभियानाचा भाग म्हणून ५ लाख महिलांची नोंदणी केली आहे, तसेच गोव्यात सुमारे ७००० महिलांची नोंदणी केली आहे.
देशभरात ७० कोटी महिला आहेत, पण त्यांचा आवाज ऐकला जात नाही. गेल्या ११ महिन्यांत गोव्यात महिलांच्या ७ हत्या झाल्या आहेत. 50 हून अधिक महिलांवर बलात्कार झाले, ५० हून अधिक महिलांची छेडछाड झाली, त्यांना न्याय हवा आहे. महिलांना ३३ टक्के आरक्षण लागू होत नाही. तो आमचा अधिकार आहे. हा अन्याय आहे, आमचा लढा संपलेला नाही. गोव्यात महिला काँग्रेसमध्ये दाखल झालेल्या सात हजार नव्या महिलांसाठी मे महिन्यात राज्यात दोन दिवसीय नेतृत्व प्रशिक्षण शिबिर घेण्यात येणार आहे.
२०२७ च्या विधानसभा निवडणुकीसाठी सर्वांनी काँग्रेस पक्षासाठी काम करावे, असे आवाहन पाटकर यांनी केले. भाजप सरकारने गेल्या १३ वर्षांत अन्याय केला आहे. बलात्कार वाढत आहेत, महिलांवरील गुन्हे वाढत आहेत, महिलांसाठी समाजकल्याण योजनांचे पैसे देण्यास उशीर होत आहे. महागाई, बेरोजगारी आणि भ्रष्टाचार या मूळ मुद्द्यांवरून लक्ष विचलित करण्याचा भाजप सरकारचा प्रयत्न आहे, असे ते म्हणाले. २०२७ च्या गोवा विधानसभा निवडणुकीसाठी एकजुटीने काम करण्याचे आवाहन माणिकराव ठाकरे यांनी केले.
गोव्यातील महिलांना अनेक समस्या भेडसावत आहेत. या प्रश्नांविरोधात आंदोलन करण्यासाठी महिलांना तयार करण्याची गरज आहे. महिला संवर्गाला सक्रिय ठेवण्याची गरज आहे. आपल्याला निवडणुकीच्या मोडमध्ये येण्याची गरज आहे. शिस्तीने एकजुटीने काम करण्याची गरज आहे. जनता काँग्रेससोबत आहे. निवडणुकीला दोन वर्षांचा अवधी असून, त्यासाठी खंबीरपणे काम करण्याची गरज आहे. गोवा महिला काँग्रेसच्या नव्या अध्यक्ष म्हणून डॉ. खलप सर्व महिलांना न्याय देतील आणि पक्ष बांधणीकरताना सर्वांना सोबत घेतील, असा विश्वास चोडणकर यांनी व्यक्त केला.