जिल्हा पंचायत निवडणुकीत ५० टक्के महिलांना उमेदवारी देण्याचा महिला काँग्रेसचा प्रयत्न

जिल्हा पंचायत निवडणुकीत ५० टक्के महिलांना उमेदवारी देण्याचा महिला काँग्रेसचा प्रयत्न

• पणजी : गोवा प्रदेश महिला काँग्रेस प्रत्येक तालुक्यात फिरून डिसेंबरमध्ये होणार्‍या जिल्हा पंचायत निवडणुकीसाठी ५० टक्के महिला उमेदवार उभे करण्याचा प्रयत्न करेल, अशी माहिती अखिल भारतीय महिला काँग्रेसच्या अध्यक्षा अलका लांबा यांनी दिली.गोवा महिला काँग्रेसची उभारणी आणि २०२७ मध्ये होणार्‍या विधानसभा निवडणुकीसाठी ४० महिला नेत्यांची निवड करण्याचे काम सुरू असल्याचेही लांबा यांनी सांगितले.
• शनिवारी आयोजित पत्रकार परिषदेत त्या बोलत होत्या.यावेळी गोवा प्रदेश महिला काँग्रेसच्या नवनियुक्त अध्यक्ष डॉ. प्रतिक्षा खलप उपस्थित होत्या. डिसेंबरमध्ये जिल्हा पंचायतीची निवडणूक होत असून आमच्या पक्षात महिलांना ३३ टक्के आरक्षण असेल. महिलांसाठी राखीव असलेल्या सर्व जागांसाठी तसेच सर्वसाधारण जागांसाठी आम्ही निवडणूक लढवू शकणार्‍या महिलांची तयारी करत आहोत आणि एकूण जागांपैकी ५० टक्के जागा महिला लढवतील, असे लांबा म्हणाल्या.गोव्यात २०२७ मध्ये महिलांसाठी ३३ टक्के आरक्षण लागू करण्यासाठी आम्ही केंद्रावर दबाव आणत आहोत.
• आम्ही निवडणूक लढवू शकणार्‍या आणि जिंकू शकणार्‍या ४० महिला नेत्यांची ओळख पटवू. राज्यभरातील ज्या महिलांना निवडणूक लढवायची आहे, त्यांना आम्ही विचारू आणि त्यांची नावे पक्षाकडे सुचवू, असेही त्या म्हणाल्या.लांबा म्हणाल्या.
• महिलांना ३३ टक्के आरक्षण देणारे विधेयक लागू करण्यासाठी महिला काँग्रेस देशभरात लढा देत आहे. केंद्रातील भाजप प्रणित सरकार महिलांच्या विरोधात आहे. हे विधेयक मंजूर झाले असले तरी त्याची अंमलबजावणी झालेली नाही. हा भाजप सरकारने केलेला हा विश्वासघात आणि अन्याय आहे. या मुद्द्यावर आम्ही देशभर आंदोलन करत असल्याने गोव्याच्या मुख्यमंत्र्यांना घेराव घालण्याबरोबरच गोवा विधानसभेबाहेर हा मुद्दा उपस्थित करण्याचा आमचा विचार आहे.
• महिलांच्या सुरक्षेच्या मुद्द्यावर विधानसभेत चर्चा व्हावी यासाठी आम्ही सरकारला भाग पाडू. महिलांची सुरक्षा, समानता आणि महागाईचा मुद्दा आम्ही मांडणार आहोत.गेल्या वर्षी सप्टेंबरपासून सुरू झालेल्या पक्षाच्या सदस्यता अभियानात गोव्यातील सात हजार महिला सदस्यांची नोंदणी करण्यात आली असून आणखी महिला पुढे येतील, असा विश्वास खलप यांनी व्यक्त केला.महिला काँग्रेसवर लक्ष केंद्रित करून तालुकास्तरीय आणि बुथस्तरीय बैठका घेणार आहोत. महिला काँग्रेसची कॅडर तयार करणे हे आमचे ध्येय आहे, असे त्या म्हणाल्या.
• गोव्यातील कायदा व सुव्यवस्थेची स्थिती दयनीय असल्याचे सांगून खलप म्हणाल्या की आत्तापर्यंत खूप सहन केले आहे. बलात्कार, अपहरण-खून, महिलांवरील हिंसाचार आपण रोज पाहत असतो. सरकार कुठे आहे आणि महिलांना त्यांचा पाठिंबा कुठे आहे? बलात्कार आणि अपहरणाच्या घटना घडत असताना भाजप महिला मोर्चा आवाज का उठवत नाही? अधिकारी संपर्क साधत नाहीत, वेळेवर एफआयआर दाखल होत नाहीत. गोव्यात महिलांना ३३ टक्के आरक्षण मिळावे, अशी आमची मागणी आहे. आम्हाला महिलांचे प्रश्न पुढे घेऊन सरकारविरोधात त्यांचे प्रश्न मांडायचे आहेत आणि रस्त्यावर उतरून आंदोलन करू, असे त्या म्हणाल्या.
• महिला काँग्रेसतर्फे २४, २५ आणि २६ मार्च रोजी दिल्लीत ५०,००० महिला सदस्यांसाठी राष्ट्रीय स्तरावरील नेतृत्व प्रशिक्षण कार्यक्रमाचे आयोजन करण्यात आले असून गोव्यातही असाच कार्यक्रम होणार आहे, असेही लांबा यांनी सांगितले. यावेळी जीपीएमसीच्या प्रदेश सरचिटणीस लिबेराटा मदेरा उपस्थित होत्या.