स्मार्ट सिटीच्या कामांबाबत मुख्यमंत्र्यांची कबुली म्हणजे प्रचंड भ्रष्टाचाराची आणि भाजपच्या ३० वर्षांच्या अपयशाची ठोस पुरावा….. अमित पाटकर
स्मार्ट सिटीच्या कामांबाबत मुख्यमंत्र्यांची कबुली म्हणजे प्रचंड भ्रष्टाचाराची आणि भाजपच्या ३० वर्षांच्या अपयशाचा ठोस पुरावा….. अमित पाटकर
मुख्यमंत्री डॉ. प्रमोद सावंत यांनी आज पणजी कार्यकर्ता मेळाव्यात केलेले वक्तव्य हे भाजप सरकारच्या अपयशाची उघड कबुली आहे आणि काँग्रेस पक्षाने वारंवार मांडलेल्या मुद्द्याला स्पष्ट दुजोरा आहे — स्मार्ट सिटी अंतर्गत झालेली कामे निकृष्ट दर्जाची असून या प्रकल्पात मोठ्या प्रमाणावर भ्रष्टाचार झाला आहे.
मुख्यमंत्र्यांनी स्वतः मान्य केले आहे की अनेक कामे योग्यरीत्या झालेली नाहीत आणि नागरिकांना प्रचंड गैरसोयींचा सामना करावा लागला आहे. यामुळे काँग्रेस पक्षाचा आरोपच खरा ठरतो की स्मार्ट सिटी प्रकल्प हे जनतेच्या पैशांचे लुटीचे साधन होते.
मी मुख्यमंत्र्यांना स्पष्टपणे आठवण करून देतो की १९९४ पासून आजपर्यंत सतत पणजीमध्ये भाजपचे आमदार आहेत. गेली तीन दशके पणजीच्या विकासाची जबाबदारी भाजपकडे होती. आज जर पणजीची अवस्था दयनीय असेल, तर त्याला पूर्णपणे भाजपचे नेतृत्व आणि त्यांच्या आमदारच जबाबदार आहेत.
स्मार्ट सिटीच्या नावाखाली कोट्यवधी रुपये खर्च करून अपूर्ण, निकृष्ट आणि नागरिकांना त्रासदायक कामे करण्यात आली. या अपयशाची जबाबदारी कोण घेणार?
पणजीकर भाजपच्या खोट्या आश्वासनांना आणि अपयशी कारभाराला आता कंटाळले आहेत. आता पुरेसं झालं आहे! पणजीच्या नागरिकांवर भाजपच्या ३० वर्षांच्या अपयशाचा हिशेब मागण्याची वेळ आली आहे.
काँग्रेस पक्ष पणजीच्या जनतेसोबत ठामपणे उभा आहे. आम्ही पारदर्शक प्रशासन, प्रामाणिक कारभार आणि खऱ्या अर्थाने विकास यासाठी कटिबद्ध आहोत. पणजीकरांच्या हक्कांसाठी आम्ही सतत आवाज उठवत राहू.
जय हिंद!
*अमित पाटकर*
अध्यक्ष, गोवा प्रदेश काँग्रेस समिती
