बलात्कार प्रकरणातील आरोपी डॉक्टरवर कारवाई करण्याची महिला काँग्रेसची मागणी
पणजी: गोवा प्रदेश महिला काँग्रेसने सोमवारी चिंचणी येथे निदर्शने करून डॉ. सॅम्युअल अरवाटिगी याच्या मालकीचे क्लिनिक तात्काळ सील करण्याची आणि बंद करण्याची मागणी केली. डॉ. सॅम्युअल अरवाटिगी याला बलात्काराच्या प्रकरणात कुंकळ्ळी पोलिसांनी अटक केली आहे. आरोपी सध्या न्यायालयाच्या आदेशानुसार १४ दिवसांच्या न्यायालयीन कोठडीत आहे.
निषेध मोर्चाला संबोधित करताना, गोवा प्रदेश महिला काँग्रेसच्या अध्यक्षा डॉ. प्रतीक्षा खलप यांनी या गुन्ह्याचा तीव्र निषेध केला आणि डॉ. अरवाटिगी याची वैद्यकीय नोंदणी तात्काळ निलंबित करण्याची मागणी केली.
हे त्यांच्या क्लिनिकमध्ये काम करणार्‍या नर्सवर केलेले एक घृणास्पद कृत्य आहे. जरी डॉक्टर सध्या कोठडीत असला तरी, त्याला सोडल्यास पुन्हा गुन्हा होण्याची शक्यता आहे. त्याचा परवाना रद्द करावा आणि क्लिनिक कायमचे बंद करावे. असे गुन्हे खपवून घेतले जाऊ नयेत. महिलांना न्याय मिळावा यासाठी आम्ही आवाज उठवत राहू, असे डॉ. खलप यांनी ठामपणे सांगितले.
जिल्हा पंचायत सदस्य मिशेल रिबेलो यांनी पीडित महिलेने तक्रार दाखल करण्याच्या धाडसाचे कौतुक केले. पुढे येण्यासाठी प्रचंड ताकद लागते. डॉक्टरांना जीवनरक्षक मानले जाते, परंतु या प्रकरणात, आरोपीने एका महिलेची प्रतिष्ठा हिरावून घेतली आहे. आपण पीडित महिलेच्या पाठीशी उभे राहिले पाहिजे, असे त्या म्हणाल्या.
महिलांवरील वाढत्या गुन्ह्यांवर सरकारचे मौन आणि निष्क्रियतेवर गोवा प्रदेश काँग्रेस कमिटीच्या सरचिटणीस मनीषा उसगावकर यांनी प्रश्नचिन्ह उपस्थित केले. आणखी किती महिलांना त्रास सहन करावा लागेल? दररोज आपण बलात्कार, छेडछाड किंवा हत्येच्या घटना ऐकतो. सरकार का डोळेझाक करत आहे? मुख्यमंत्र्यांनी कठोर कारवाईचे आश्वासन दिले होते – ते कुठे आहे? असे त्या म्हणाल्या.
दक्षिण गोवा जिल्हा काँग्रेस समितीचे अध्यक्ष सावियो डिसिल्वा यांनी पक्षाच्या पाठिंब्याचा पुनरुच्चार केला. गोवा काँग्रेस पीडितेच्या पाठीशी खंबीरपणे उभा आहे आणि तिला न्याय मिळेपर्यंत लढत राहील. या निषेधात अनेक महिला नेत्या आणि नागरिकांचा सहभाग होता, जे जलद न्याय आणि आरोपींवर कठोर कारवाईची मागणी करण्यासाठी एकजूट झाले होते.
